بـــنت في التجنييد خخخخخخخخ يا حليلها..

أنتي مجرد تكملة عدد ..!!

كل يوم أسمع هـالجملة .. بس ماتأثر فيني لأني بصريح العبارة سطح مامني فائدة ..
ومسألة شعور وأحاسيس أحسها موضة قديمة ومضيعة وقت .. يعني أفضل شي في الحياة انك تكون مفهي ..


مدري بس أحس أني عاله على أهلي .. كلن يود إني أموت بأي طريقة ..أذكر مره في حفلة نجاحي أبوي أقترح على أخواني انهم يختارون لي طريقة يموتوني فيها .. وصاحب أحسن طريقة ياخذ هدايا نجاحي كلها .. وكلن قال رايه .. الي قال نقطعها تقطيع ثلاجة .. ولي قال نحطها في كيبل عداد الكهرب.. وكل هذا وأنا مفهيه مدري وين الله حاطني به .. وهذا إلي مضايق أبوي زوود وباط كبده مني .. ( كت )



وفي مكان ثاني ..

دق الفاكس .. ولتفت له رجال يشبهونه بالهيلكوبتر من كثر ما يفر رأسه يمين وشمال يطقطق فيه .. واخذ الفاكس بكل ثقة وبعدها كتب فاكس ثاني وبداء يناهق ينادي ياعسكري ..لين جاه ذاك الملازم ينتفض وقاله نعم طال عمرك .. وهو في باله يقول ليت من يجرك بشواربك إلي تقل مروحة أبو ثلاث رجول .. قال له الضابط .. بلغ جميع الوحدات العسكرية بأن تم القرار بتجنيد البنات في الجيش وأرسلهن للحدود لحماية الوطن .. وهذا بأمر من فوق ولايمكن نكسر هالأمر .. ولكن لاتنسون .. جندوا البنات بسريه تامة وفقا للأوامر .. ( كت )


في منزل سليندر


دق الجرس وكالعادة فهيت مع رنينه مادريت إلا أبوي يعطيني كعابي ويقولي ماتسمعين الجرس .؟؟ قومي أفتحي الباب جعلتس بالذهاب .. قمت وأنا أعدل في خشمي إلي أنعفط ويوم فتحت الباب ولا فيه عساكر واقفين قدامي ويجروني مع قروني وواحد فيهم يقول لي : ولا كلمة تم تجنيدك بسريه تامة أي كلمة يكتب ضدك في التحقيق .. والعسكري الثاني يقول .. يا سليّم قريت عليها حقوقها .. وسليّم يقول ايه طال عمرك .. وأنا ماغير اجاعر لا لا ..وأتمسك بحدود الباب .. وأبوي يركض هو وأمي وأخواني وأنا أمد يدي عشان يساعدوني مادريت إلا أمي تفك يدي من على الباب وأبوي يدفني برجله ويقول خذوها بسرعة خذوها .. وخواني جايبين لي ملابسي بكيس ويقولون لي معليش ياسليندر مافي وقت نحطها في الشنطه ولكن براطمك بكبرها شنطه آن الأوان أنك تستخدمينها ...( كت )


في مكتب الضابط على الحدود الشمالية


قرب الضابط من طابور البنات إلي تم تجنيدهم .. وبداء يسأل كل وحده وش اسمها وكم عمرها .. وبعدين التفت في الكاتب حقه حصل معه دربيل قاعد يقز في البنيات .. والضابط تحوم تسبده .. فصفقه بحزامه وقاله تقز فيهن وهن عندك في المكتب .. مير الله يخلف على جدانك .. حط الدربيل وقراء على البنات وش يسوون .. بداء الكاتب الجندي يقرا علينا وش نسوي ووش مانسوي .. وبعدها جرونا لغرفة الملابس وعطونا سروالين واحد صغير والثاني سروال سنه .. وفنيله علاقي بالإضافة للبس الجيش .. وقال لنا الضابط .. هذا الموجود .. مابعد وفروا لكم ملابس نسائية .. وطبعا ممنوع الواحد يقول ليه كذا أو ليه كذاك .. ولا عقاب على طول ..


جاء وقت النوم .. وكل وحده متبطحه بسروال الصغير والعلاقي تناظر الثانيه بحسره .. وقالت لي وحده منهن ... أنا مو قادرة استوعب إلي حصل من الصبح .. قلت لها كلي تبن .. أنا فيه مسألة رياضيه .. من أيام الثانوية وأنا مو قادرة استوعبها .. خلي إلي حصل الصبح عاد .. ( كت )


صباح أول يوم في التجنيد ..

دخل الضابط يشييك علينا لقي كل البنات مثل مايبي إلا أنا لقيني لابسه تنوره جيش ... قالي وش ذا .. قلت له معليش ياحضرة الضابط البنطلون كان واسع علي والله لو أني أدخل رجولي الثنتين في رجل أنه غير يشيل من كبره وغير قصية وحده من الرجول ودخلت الرجلين فيها.. وصارت تنوره ضيقه .. وهو إلي يجرني مع شوشتي ويقولي أنا أوريك الدلع ذا كيف يخرج منك .. وهو ينادي ياعسكري .. والعسكري يجي يجرجر فيني مدري وين ماخذني ...( كت )


تفتيش عسكري

بداء تجنيد البنات بشكل الرسمي ..كتابة الاسم .. وتعريف ببعض مهام الجيش .. ووحده من البنات توشوش للثانية وتقول : عسى سليندر بخير .. ماخلصت كلمتها إلا وأنا داخله وراسي محلوق على الصفر صلعاء وبعض دميعاتي على خدي وناشق من الصياح .. والخوف بداء على وجيه البنات .. والضابط بداء التفتيش العسكري على البنات بدون رحمه .. وفقد الضابط وحده من البنات وقال وينها فيه قلنا له هي شوي تعبانه قال من وشو قلنا له لا هي بس يعني ... وصرخ فينا وشو ... قلنا له إجازتها الشهرية بدت .. طبعا كان كلامنا مع الضابط أثر عليه صدمه عنيفة خصوصا أن الحرب ماتنتظر الإجازات الشهرية تقضى ..المهم كمل الضابط التفتيش ومن ضمن تفتيشاته .. كان يمسك مقدمة البنطلون ويجره بقوه ..ويوم سألناه قال لنا ممنوع الشعر الغير مرغوب فيه .. أجره عشان لو كان طويل بتصرخين ونعرف انك مخالفه القانون ... ( كت )

التدريبات


جينا مكان التدريب وقال لنا الضابط ...اليوم بندربكم على القفز العالي والرشاش والمدفعيات والمدرعات .. تمتمت أنا وقلت حنا نعرف المدرعات من قبل نجي عندكم يازلايب .. بس علمونا على الرشااش خبركم كل بنت ودها تعرس .. وطنشني قال يالله جندي سر .. كلهم ساروا إلا أنا ماسريت .. التفت لي الضابط وقال لي وراك ...؟؟ قلت له معليش أنا ماحب زواج المسيار وماحب الدروس العملية .. أنا أحب الشفوي بس .. مادريت إلا والكاتب يمد شفته .. فاهم غلط الأخ ( كت )

وبعد معاناة انتهى التدريب ورجعنا غرفنا .. وأنا ظهري تقل مركبه دربوكة من زود الطقطقة إلي فيه ..


بعد شهر من التجنيد


جاء الضابط ومعه كم كرتون ويقول لنا هذي رسايل من أهاليكم كل وحده تجي تستلم رسالتها .. ولكن بعد التفتيش على الرسايل .. بداء الضابط يفتش رسايل كل بنت ويسلمها لها ، لين وصل الدور علي .. وفتح الرساله حقتي لقي فيها ( دقيق أخضر ) قالي وش ذا قلت له ( حنى ) قالي حق وشو .. قلت له لصلعتي .. وصيت أهلي فيها عشان يطلع لي شعر .. وهو إلي يكب الحنى في الزبالة وهو يقول لو تحطين في راسك سيلكون الشين شين يابعدي .. ومافي داعي أوصف لكم عن إحساسي والحر إلي بتسبدي .. لإن أصلا أنا ماعندي إحساس.. ماغير إني بغيت أقوله من زين وجهك إلي يشبهونه في قوقل ارث ( كت )


تقسيم السريات

جاء الضابط وبداء يقسم في المجموعات .. وقال : أنا اعرف أني لو حطيت البنات في سريه وحده أنها بتكون ثغره يدخل العدو فيها بلدنا وعشاان كذا قررت أني أوزع البنات على مجموعات الرجال .. <-- عارف إننا بنجيب العيد .. وزعنا وبدينا تدريب على حماية الظهر وكيف كل سريه تغطي السرية الثانية .. بدينا حنا يابنيات نجتهد في التدريب ونحاول نركز .. واكتشفنا أن العسااكر هم بعد بدوا يركزون وخصوصا في كيفية حماية الظهر .. وتغطية السرية المتقدمة وهذا نفس السبب إلي خلى الضابط يغير رأيه ويخرجنا ويحطنا في مجموعه لحالنا .. ويوم شفنا أننا متوهقين لحالنا قلنا لضابط .. وراك متوحش خلي العيال يقزون حنا موافقين .. أهم شي مانكون وحدنا نخااف .. وهو إلي تحوم تسبده منا .. وهو يقول وحدكم يعني وحدكم صدق بنات أخر زمن .. وأنا أقول يعني أنتم إلي رجال أول الزمن .. مادريت إلا وهو يتلني مع علباي أول الصف .. ويقول يامن يرجعني لك يازهيّه بسلامه عمر .. عذابك أرحم .


ساعة الصفر

وصلنا خبر أن العدو قريب من الحدود .. ولازم كل واحد يأخذ مكانه .. طبعا أنا ماراح أتكلم عن العدو إلي لو تشوفه تقول أنهم كومبارس في أغنيه هندية من كثرهم .. ولا راح أتكلم عن ضعفنا الجسمي إلي مايقدر حتى يضغط على أزارير الدبابة <---هي صدق فيها أزارير ولا على الرعب والنفضه إلي صابتنا ولي يشوفنا يقل رقاصه مصريه كلها شحم تهز <-- وراك متوحشة قولي فيفي عبده وريحينا .. أنا ودي أتكلم عن الحر والسموم إلي على الحدود .. ياهو حررر .. المهم قمت وشغلت وحده من الطيارات عشاان تهوي لنا شوي بمراوحها .. ويوم الضابط شافني انهبل من القهر وقام يجري تجاهي ويقول قفلي الطيارة قفلي .. و احسبه فرح ويقول لي ارفعي المروحة أكثر ..

رفعت سرعة المروحة ومدري وش ضغطت ثاني <--- واضح .. المهم أنها طارت وبس وقمت احوس وحوس ابي انزل ماقدرت .. واخترقت صفوف المملكة .. ولا صفوف العدو بدري علي .. وماغير عسكر السعودية يجرون يبون النجاة .. وحست فيم لين مالقوا طريق للمفر غير جهة العدو .. وصاروا يجرون جهة العدوا ويصارخون مستسلمين مستسلمين لاتطلقون النااار ..
والعدو مايعرف لغة عربيه ..بس واحد كنه يعرف كم كلمه من طالب عربي كان يدرس عندهم .. وسمع كلمة ( النار ) ويحسبها ( العار ) وقال لضابط إن الجيش السعودي ماراح ينسحب وأنهم ناويين الموت مدافعين عن بلدهم عن العار إلي بيصيبهم لو انهزموا .. المهم أني بديت أخيرا استوعب أن إلي قدامي يدين طيارة زي يدين البلستيشن .. وقمت احوس فيها لين وصلت للعدو وقمت أحوس مره تحت ومره فوق .. والعدو يحسب أني طيار محترف مغامر .. بداء ينسحب العدو شوي شوي لين قضى وتم النصر لنا .. لحقوني العيال بطيارات ثانيه وقفزوا من المظلات ومدري وشو المهم أنهم نزلوني ..لاتدققون شلون ..

جاني الضابط ذا .. إلي لو تبي منه مايقاطعك .. تفتح موضوع معه وتقوله أرجوا التثبيت .. هنا بس يسمعك ..قالي أن الحركة إلي سويتيها جدا شجاعة ولوني أظن أنها صدفه .. ولكن لازم نرفع فيك خطاب عشاان يكرمونك.. رفع الخطاب للملك .. وجاهم الرد .. وأنخبصوا .. وعقدوا اجتماعات وضباط جدد جو عندنا .. وزحمه .. وكل هذا وأنا مفهيه ماسألت وش فيه .. وجاء واحد من الضباط الكبار وقالي أنا والبنيات ..السالفة كلها .. طلع أن الضابط إلي جاله الفاكس في البداية متوظف بالواسطة .. ولايعرف يفك الحرف زين .. وأن الفاكس كان مكتوب فيه ( يجب استخدام النباتات على الحدود .. وبسريه تامه .. لتضليل العدو ) وهو يحسب النباتات .. البنات وعشان كذا جندونا ..( أجل نباتات في الصحراء .. شلون العدو ينغش فيها ) المهم على قد مازعلت على الشرشحه على قد مافرحت أني ولأول مره أسوي شي زين وسنع ..


مايستفاد ..

ثلاث فقط لاغير ..
1- لاتجندون البنات تكفون ..
2- حنا نعرف نتعامل مع المدرعات بس علمونا على الرشاشات ...
3- لاجيت تكتب ضابط .. اكتبه بضاد لاتكتبه بالظه وتوهق في التعديل مثلي ..
منقول

هههههههههههه


مره روعه على ماهي طويله



والله مشكله العسكر اسمع انهم ناشفين مره مره

والبنت ما راح تتجند



سلمت يمينك

هههههههههههه


مره روعه على ماهي طويله



والله مشكله العسكر اسمع انهم ناشفين مره مره

والبنت ما راح تتجند



سلمت يمينك

هلين فيصل ....مشكور علي هالطله



>>>ودها تتجند ما وك تتوسط لها هههههههههههههههههه



دمتم لمن احببتم